Pahit2 Manis 2

Mr. Aki sejak belajar membuluk dan masuk keluar buluk rakan, ternyata dunia ini bukan tampat selamat main tapuk2 lagi. Kentut yang inda bebbunyi pun buli kita kanal siapa urang itu, tidak zaman 50an kalau kentut batapuk d kain sarung pun selamat. Sia tingok demam juga pak Najib d kerajakan oleh pembuluk, aduii dogo... kalau Mr. Aki punya sipir sanang saja.

1. Yang mangantam kerajaan inda tingok langit, terutamanya yg makan gaji dengan karajaan, bah beranti bah makan gaji dengan karajaan alang2 kasi maki ini kerajaan. Pada Mr. Aki sepatutnya kalau kamu urang nampak inda butul itu pemimpin, karana makan harta rakyat napa kamu inda tegur kasi butul. Ini mangantam d luar rumah dan pakai tuping panakut, yang bagus katalah bagus bah, jangan semua inda bagus. Mr. Aki malihat suasana ini karana manusia inda syukur pada Allah punca segala.

2. Yang si pambangkang pulak lagi turuk, perangai dia ( yg indada utak ) yang ada utak buli tahan berhujah d dewan rakyat... nah, urang inilah kalau mau menjadi pembangkang. Kasi maju negara, kasi jaga ini agama islam supaya mati masuk suruga... ini Mr. Aki sukung utak bergeliga tapi kalau menjadi pembangkang main sadap mulut saja, bagus diam2 ... waktu mengundi pangka apa yg kamu lihat benar lagi benar.

3. Ada urang melihat negara malaysia ini macam bukan negara dia. Kalau macam bagitu keluarlah bah d negara ini, buat negara sendiri ... budu butul urang ini, bagus mati kecil2 dulu inda kasi susa urang lain.

4. Kerajaan pulak jangan manabur janji itu janji ini, pada urang kampung ... inda bagus. Pasal rakyat pun lama kalamaan bosan dengan mulut manis. Apa sala cakap jujur, urang kampung pun paham juga...jawatan pulak jangan kasi jadi milik 7 keturunan, urang lain pun pintar2 juga buat karaja bah. kasi pasing2 itu jawatan baru ati rakyat tertambat.

Ok... lah sampai d sini dulu Mr. Aki berceramah, nanti sambung cerita lain...