Tambirang Juta-juta ..

Mr. Aki pulang dari bandar

Carita juta2 bikin kasi sadap parasaan.

Gata Mr. Aki

Pagi tadi Mr. Aki ke bandar kasi jual gata, kantalan dan sikarap. Suda jual gata d paladang dan dapat duit, Mr. Aki pigi minum d kadai.Biasalah urang bukit kalau turun d bandar mata2 urang bandar tingok macam2 pisin d tamba lagi pakaian Mr. Aki inda sama pakaian urang bandar, mereka indada duit pun wangi2 dan pakaian tajam2 d gusuk, kulit diurang pun putih2, rambut santiasa kamas, pen macam2 nama tarsangkut d pukit baju diurang. Mr. Aki yang indada sikula, barkaki ayam, kulit suda keriput, baju buruk2 batampal. Inilah pisin Mr. Aki sejak lahir sampai sikarang... bukan inda mau macam diurang itu... tapi Mr. Aki kana berdiri d alam kanyataan..Sesuda Mr. Aki mangambil makanan berlaukkan ayam,ikan dan kopi O dan duduk d pinsuk2 ( di pinjuru kadai ), untuk menikmati makanan bandar sambil dalam ati Mr. Aki bersyukur pada Allah kerana dapat makan dan minum.. dan biasalah kadai macam2 pikiran dan kumpulan bercerita itu ini tantang dunia. Macam diurang lebih tau dari menteri kadang2 ...

Di meja sabala kanan Mr. Aki urang2 pulitik sadang bercarita tantang purijik yg mereka lobi pada CM bukan alang2 jumlah dia juta2 ... guyang juga jantung Mr. Aki carita diurang juta2, guyang bukan pasal Mr. Aki baliur mau minta ampi. Tapi nilainya amat basar diurang carita... d pindikkan carita, mangkali diurang itu suda lama duduk d kadai KUPI. Maka itu satu urang pun panggilah itu bos kadai, mau bayar makanan diurang ... yg bacakap pasal juta2 bangun dan kasi kaluar dumpit dia, buli tahan juga dumpit dia tabal2, Mr. Aki pura2 menjeling mau tingok isi dumpit dia... sakali dia buka Mr. Aki takajutttt basar rupa2nya yg kasi tabal dumpit dia karatas no ekor ... heheheh

Urang itu pun kasi kaluarlah duit merah2 ..kusut2 macam lama tarsimpan ( istok2 lama ) mangkali itu ..Lepas itu Mr. Aki punya geliran mau bayar makanan, BAH biasalah bah... urang bukitkan.. indada dumpit main simpan saja d palastik ikat2 gata.. oleh karana duit Mr. Aki terikat kamas nahhh lama cikitlah mambuka... urang d kadai makan pun tingok saja, Mr. Aki inda paduliii ... inda juga banyak araga gata Mr. Aki bah...adalah labi 3 ribu saja, dulu2 waktu araga gata naik pandapatan ari ini 3 x ganda... itu urang carita juta2 diam2 saja ketika Mr. Aki limpas d meja diurang...

Jadi Mr. Aki tingok2 urang2 d kadai kupi hampir 65 % carita dia kumpau indada isi, itulah bikin malas Mr. Aki turun salalu d bandar.